Nan moman kanpay elektoral Ameriken an antre nan faz final li, gen plis elektè k ap eksprime sipo yo pou kanpay prefere yo pa mete machandiz elektoral sou yo.
Sa yo pa reyalize ke chapo Trump "Fè Amerik Vinn Gran Anko" a oubyen mayo "Dam San Timoun Ki Gen Chat" anfavè Harris te petèt fabrike nan Lachin.
Ak asistans platfom ecommerce yo, komèsan Chinwa yo ap inode mache a ak machandiz elektoral ki bon mache. VOA konstate fabrikan Ameriken pwodui sa yo gen anpil difikilte pou yo fè konpetisyon ak machandiz Chinwa yo.
Ben Waxman, fondatè ak ko-propriyetè American Roots, yon mak rad Ameriken di VOA: "mwen kwè kantite bagay kap vann sou Amazon ak Etsy ki soti Lachin ak lot peyi abo bato kato ke yo dechaje sou kot Etazini gen enpak drastrik sou fabrikan Ameriken tankou mwenmenm, ki gen difikilte pou fè konpetisyon ak yo epi ogmante biznis nou.
Waxman pat vle presize konbyen sa koute pou pwodui machandiz la Ozetazini ni konbyen benefis li fè akoz kè sote pou vi prive li. Sepandan misye di Sèvis Mandaren VOA a ke mayo ki fèt Ozetazini yo pa egzanp vann pou $15 chak, tandiske sa ke komèsan Chinwa yo ap vann sou Temu ka koute $3 sèlman.
Waxman di: "Li pi chè lè w konsidere travayè Ameriken yo touche plis lajan epi nou oblije respekte règ anviwonmantal yo. Misye tap fè referans ak kèk pami kritik Etazini ap fè sou sityasyon travayè Chinwa yo depi lontan.
Konpay li an, ki fè pati sendika travay yo, ap pwodui machandiz pou kanpay prezidansyèl yo depi 2016. Pi fo nan sa yo vann se mayo ak sweatshirt, e tout materyo bru yo sèvi yo soti Ozetazini.
Jounalis VOA Mandaren Adrianna Zhang ekri vesyon orijinal repotaj sa a