Nan yon rapò madi 22 oktòb la yo bay yo di yo choke devan yon atak "brital" resan gang yo fè kote yo fè ravaj nan peyi a.
Depi mwa jiyè, "sitiyasyon an malerezman vin pi mangonmen," se sa Maria Isabel Salvador, chèf misyon LONI te di devan Konsèy Sekirite a.
Li te mansyone ogmantasyon kantite moun ki deplase andedan peyi a, ki te depase 700,000 nan mwa septanm nan, ansanm ak pwosesis tranzisyon politik ki te kòmanse nan prentan an ki, "malgre kèk avansman inisyal," ap fè fas ak "defi enpòtan, ki transfòme lespwa an gwo enkyetid."
"Sitiyasyon sekirite a rete trè frajil, ak nouvo pik vyolans yo," li te ajoute. Li te denonse atak "terifyan ak brital" gang yo kont lokalite Ponsonde ki te lakòz "115 sivil mouri ak plizyè dizèn blese" nan dat 3 oktòb, selon dènye bilan li te bay.
Responsab LONI an te pale tou sou yon seri atak nan nan jou ki pase yo nan metwopòl Pòtoprens ak anviwon yo, ansanm ak vyolans seksyèl ki pran yon dimansyon "sovajri enpansab" kont fanm ak tifi.
"Ayisyen yo kontinye ap soufri tout kote peyi a pandan aktivite gang kriminèl yo ap entansifye epi elaji depase Pòtoprens, ap simaye laterè ak lapèrèz, mete aparèy sekirite a ajenou," li te ensiste pou l di. "sitiyasyon imanitè a pi mal toujou."
Nan dènye rapò li a kèk jou avan sa, sekretè jeneral ONU a, Antonio Guterres, fè remake polis la, ki sipòte espesyalman pa misyon miltinasyonal pou ranfòse sekirite (MMAS) Kenya a dirije, te "lanse operasyon wòdpòt kont gang yo" nan kèk katye nan kapital la, men "li toujou gen difikilte pou kenbe kontwòl zòn sa yo akoz mank pèsonèl ak resous."
MMAS la, ki gen manda li renouvle nan fen septanm pou yon ane, gen pou moman sa a anviwon 430 polisye ak sòlda, sitou Kenyan, epi 600 Kenyan anplis gen pou vini nan pa lontan, men misyon an toujou "manke resous," sa ki "riske anpeche li fè devwa li byen," Maria Isabel Salvador te deplore sitiyasyon sa.