Chèf Kabinè Donald Trump ki te pase plis tan ap travay pou gouvènman li an lanse avètisman pou di kandida prezidansyèl Repibliken an koresponn ak definisyon sa yo fachis ye e ke pandan li te sou pouvwa a, Trump te sigjere ke lidè Nazi Adolf Hitler "te fè kèk bon bagay".
Komantè sa yo soti nan bouch John Kelly - jeneral Merin retrete Ameriken ki te travay nan Lamezonblanch ant ane 2017 ak 2019 lè Trump te sou pouvwa a. Deklarasyon yo pibliye Madi nan jounal New York Times ak The Atlantic. Yo kore avètisman responsab wo plase administrasyon Trump la lanse nan moman kanpay elektoral la franchi dènye 2 semèn li yo.
Kelly ap kritike Trump depi lontan. Li te akize misye nan le pase dèske li te dekri veteran Ameriken ki mouri sou chan d batay kom "kreten" ak "initil". Nouvo avètisman yo parèt nan moman Trump ap chache yon dezyèm manda epi sèmante pou l ogmante drastikman itilizasyon lame a nan peyi Etazini. Trump menm sigjere li ta itilize lafos pou pousui Ameriken li konsidere tankou "enmi andedan peyi a."
Kelly di jounal New York Times: "li te deklare plizyè fwa ke ' ou konnen Hitler te fè kèk bon bagay tou." Kelly di nomalman li te konn mete fen nan konvèsasyon an pa reponn ke "pa gen okenn bagay Hitler te fè ki te bon," men ke Trump te re-soulve sijè a nan yon lot konvèsasyon.
Nan entèvyou li ak The Atlantic, Kelly te sonje ke lè Trump te soulve kestyon bezwen "jeneral Alman" Kelly te konn mande li si l tap fè referans ak "jeneral Bismarck yo" - an palan de Otto von Bismarck, ki se chanselye ki te jere inifikasyon Almay. "siman ou pap pale de jeneral Hitler yo" Kelly te mande Trump. Epi Trump te reponn "wi, wi, jeneral Hitler yo."
Kanpay Trump la demanti deklarasyon sa yo Madi. Pot pawol kanpay la Steven Cheung deklare Kelly te "prezante tèt li tankou kloun" ak tout istwa sa yo li fabrike.
Sondaj yo montre kous prezidansyèl la sere anpil.
Kanpay Harris la te pale ak jounalis yo Madi kote yo te anplifye vwa responsab militè retrete yo epi souliyen kijan sa yo ki te travay pou Trump opoze kanpay li kounyea.
Brigadye Jeneral retrete Lame Etazini Steve Anderson di jounalis yo "moun ki konnen misye byen opoze l ak prezidans li."