M. Gachagua, 59 lane, te jwenn destitisyon li jedi apre yon pwosedi espesyal, ki te mete bout nan plizyè mwa bouch louvri ak prezidan William Ruto.
Yon desizyon jidisyè te kanpe vandredi a nominasyon moun ki pou ranplase l la.
Nan deklarasyon li te fè bay laprès li te di jounalsi yo "Mwen sezi pou wè kijan yon moun mwen te ede vin prezidan, yon moun mwen te kwè, e ki te sibi pèsekisyon pandan mwen t ap sipòte li, ka aji konsa ak mechanste kont mwen."
Li te di yo te retire moun ki t ap ba l sekirite yo, epi revoke pèsonèl ki t ap sèvi li yo.
"Si gen nenpòt bagay ki rive mwen oswa fanmi mwen, prezidan William Ruto dwe reponn pou sa," li di li te deja fè fas ak tantativ asasina avan sa.
Li t ap pale apre li te kite yon lopital nan kapital la, Nairobi, kote yo te trete l pou gwo doulè nan pwatrin li.
M. Gachagua te tonbe malad jedi, jis inèdtan anvan li te dwe temwaye devan Senatè yo nan kad pwosedi destitisyon an.
Prèske yon semenn apre Asanble nasyonal la te adopte, ak yon gwo majorite, desizyon destitisyon an, Senatè yo te jije li koupab jedi a pou "vyolasyon grav" Konstitisyon an, espesyalman menas kont jij yo ak pratik politik ki kreye divizyon etnik.
Men, Kou Siprèm Kenyan an, ki te resevwa ka a nan men avoka li yo ki te di destitisyon li an pa konstitisyonèl epi li te presipite, te kanpe vandredi ranplasman Rigathi Gachagua pa minis entèryè a, Kithure Kindiki.
Jij yo dwe egzamine ka a madi.