Sa yo se premye sanksyon ameriken pran kont antite Chinwa "ki devlope ak pwodwi dirèkteman sistèm konplè zam nan patenarya ak konpayi ris," dapre sa Depatman Trezò a te di nan yon deklarasyon.
Desizyon sa yo vize yon total 3 konpayi - 2 nan Lachin ak youn nan Larisi - ak yon sitwayen ris, pou patisipasyon yo nan devlopman ak fabrikasyon dwòn atak long distans.
Dwòn sa yo fèt pa ekspè ki baze nan Lachin epi yo fabrike nan faktori Chinwa, an kolaborasyon ak konpayi defans ris, Depatman Trezò a te presize.
Dapre pòtpawòl Depatman Deta a, Matthew Miller, "se premye fwa nou remake yon konpayi Chinwa ki fabrike li menm yon zam ki te apre sa itilize pa Larisi sou chan batay (an Ikrèn)."
Etazini te deja sanksyone konpayi Chinwa ki t ap bay konpayi ris yo materyèl ki antre nan fabrikasyon zam.
Konpayi Chinwa yo ki vize jedi yo se Xiamen Limbach Aircraft Engine Co ak Redlepus Vector Industry Shenzhen Co, konpayi ris la li menm se Limited Liability Company Trading House Vector.
Dapre sou-sekretè Deta pou Trezò a, Bradley Smith, "Larisi ap chak jou pi plis chita kò l sou ekspètiz antite etranje ak sou enpòtasyon teknoloji avanse pou alimante pwogram zam li ak avanse kanpay militè li kont Ikrèn."