Minis afè etranjè a, Dominique Dupuy pa met pye nan reyinyon konsèy prezidansyèl la, ki te konvoke l, jodi mèkredi a, pou l vin bay esplikasyon sou "malantandi" ki te genyen nan delegasyon ayisyèn nan pou 79èm asanble jeneral nasyonzini an.
Konsèy prezidansyèl la fè konnen Dominique Dupuy te neglije patisipasyon prezidan CPT a, Edgard Leblanc Fils ak konseye CPT Leslie Voltaire, nan asanble jeneral Nasyonzini an.
Sepandan, Domimique Dupuy pa reponn konvokasyon konsèy prezidansyèl la ki tap tann li nan "Villa d'accueil" a 11è maten an.
Yon lòt bò, Premye minis lan, Garry Conille, mande anilasyon konvokasyon minis afè etranjè a.
Garry Conille raple ak konsèy prezidansyèl la, se premye minis lan ki chèf gouvènman an. Chak minis gouvènman an sou lobedyans Premye minis lan.
"Kidonk tout entèraksyon avèk manm gouvènman an, tankou konvokasyon dwe fèt an konsètasyon avèk chèf gouvènman an", selon sa Garry Conille eksplike nan yon lèt li voye bay prezidan konsèy prezidansyèl la.