Bronny James, pitit gason LeBron James, jwe premye match li ki pa ofisyèl ak Los Angeles Lakers Samdi nan San Francisco nan kad yon tounwa NBA ke yo rele Summer League, Lig Ete a.
Jwè baskètbòl la ki gen 19-zan ke Lakers te chwazi nan 55yèm pozisyon draft la semèn pase, li te moute sou teren kòm menè nan premye match li nan "California Classic", yon tounwa preparasyon NBA kote dènye jwè rekri yo kòmanse abitye ak ekzijans ekip yo nan absans jwè atitre yo.
Bronny te jwe anviwon 21 minit, li te make 4 pwen (2 sou 9 shoot), 2 rebon ak 2 pas, e Sacramento Kings te kale ekip la 108-94.
Ansyen jwè Inivèsite of Southern California (USC) a te gen pou fè sa ki pa janm fèt nan istwa NBA a, ki se jwe ansanm ak papa li LeBron James lè sezon an rekòmanse nan fen mwa Oktòb la.