Gouvènè eta Lwizyàn nan, Jeff Landry, ki se yon Repibliken, sot siyen yon pwojè-lwa ki oblije lekòl yo afiche Dis Kòmandman an nan lekòl leta yo - soti nan jadendanfan rive nan inivèsite – tout lekòl ke eta a finanse – apati lot ane.
Nan seremoni siyati lwa a li deklare : "Paske si nou vle respekte lalwa, nou dwe kòmanse ak premye lwa a ki se lwa Moyiz" la.
Lwa a prevwa ke "Dis Kòmandman yo" dwe parèt sou afich an gwo lèt ki vizib ase e ke tout moun ka li alèz".
Gwo òganizasyon Ameriken pou defans libète, ACLU, fè konnen imedyatman ke li pwal mennen zafè a nan tribinal.
Gwoup la di ke nouvo lwa sa "vyole separasyon legliz ak leta epi li klèman pa respekte konstitisyon an".
Premye Amannman Konstitisyon Etazini an entèdi pou peyi a gen yon relijyon nasyonal oswa chwazi yon relijyon sou yon lòt.
Lòt eta konsèvatè nan sa ki rele "Senti Biblik" nan sid Etazini an te eseye adopte mezi menm jan an, men se premye fwa yon eta mete li nan on lwa.