Prezidan Etazini Joe Biden komemore anivèsè D-Day - Jou J ak yon omaj pou veteran yo. Li pwofite okazyon an tou pou souliyen enpotans alyans entènasyonal yo.
"Libète vo lapèn. Demokrasi vo lapèn. Etazini vo lapèn. Mond lan vo lapèn. Nan tan lontan, kounyea e pou tout tan. Lagè Ewop la pat fini pazavan yon lot 11 mwa. Men se isit viktwa nou te komanse. Nou te pwove isit la ke ideyal demokrasi nou yo pi fo pase nempot lame ni konbinezon ame nan tout mond lan. Nou pwouve yon bagay isit tou - ke pèsonn paka kraze inite alye yo."
Nap raple ke D-Day sete pi gwo atak anfibi nan listwa.
"Sa alye yo te atenn ansanm sa gen 80 zan desa, ale pi lwen lontan pase sa nou te ka fè poukont nou. Se yon egzanp puisan de kijan alyans, vre alyans rann nou pi fo. Se yon leson mwen lapriyè Ameriken pap janm bliye."
Prezidan Joe Biden, premye dam Jill Biden, Prezidan Franse Emmanuel Macron ak madanm ni Brigitte Macron nan Normandy, 6 Jyen 2024.
Pandan seremoni an, Prezidan Franse a, Emmanuel Macron te remèt meday Leyon d Onè bay 11 veteran Dezyèm Gè Mondyal la. Se pi gwo distenksyon peyi La Frans. Mesye ki resevwa meday yo te gen 98 ak 104 an. Macron bo chak veteran sou 2 bo figi yo anvan li te tache meday la sou yo.
Youn nan resipyan meday yo se yon nèg ki rele Hilbert Margol, ki te rejwenn yon batayon atiyri ki tap opere nan ès La Frans. Li te manm twoup Ameriken ki te libere kan konsantrasyon Dachau a.
Premye Minis Kanadyen Justin Trudeau (mitan) ak Prens William d Anglete pandan yon seremoni pou komemore 80em anivese D-Day nan Normandy, La Frans, 6 Jyen 2024.
Pami lot lidè ki te prezan nou jwenn Premye Minis Kanadyen an, Justin Trudeau.
"Fok nou kontinye defann demokrasi chak jou. Nou dwe jenerasyon nan lavni yo sa, e nou dwe fanm ak gason vanyan ki mete inifom lame epi fè yon pakèt sakrifis pou pwoteje libète kolektiv nou sa tou. Nou paka bliye sa."
Prens William d Angletè te pale tou.
"Asire ke nou onore memwa moun kite goumen pou libète nou se rezon ki fè nou rasanble konsa jodia. Pou di yo mèsi. Mèsi pou libète nou e mèsi pou sèvis ou rann peyi w."
Atak D Day la te tanmen ak avyon fos alye yo ki te lage bonm sou twoup Alman yo nan Normandi. Apre sa, apepre 1,200 avyon ki tap transpote twoup te rive. Anvan solèy la te leve, fos alye yo te komanse bonbade fos defans Alman yo sou kot La Frans, epi bato de gè te rive ak lot twoup pou bay ranfo.
Gen prèske 160,000 twoup Alye ki te debake Normandy men tou plizyè milye nan yo te mouri.