Nèg ame te sezi kontwòl yon lòt komisarya apre yo fin anvayi Gressier nan pwent sid Pòtoprens vandredi swa 10 me 2024 la.
Yo te blese moun, boule machin epi atake kay ak lòt enfrastrikti pandan yon pakèt moun te kouri al nan mòn.
Garry Jean-Baptiste, yon pòtpawòl pou sendika lapolis SPNH-17, di The Associated Press "Sitiyasyon an kritik. Se yon katastwòf."
Li di ke Frantz Elbé, ki se direktè Polis Nasyonal Ayiti a, enkapab e enkonpetan: "Mesye Elbé echwe."
Jean-Baptiste te di sendika a vle pou konsèy prezidansyèl tranzisyon ki fèk enstale a reklame demisyon Elbé epi bay otorite jistis yo lòd pou yo lanse yon ankèt sou kriz la.
"Lapolis kontinye pèdi lokal ak ekipman ak ofisye," se Jean-Baptiste ki ap pale konsa, e li di ke bandi ame yo atake epi boule omwen 30 komisarya lapolis ak sou-komisarya nan dènye mwa ki pase yo.
Li tou akize Elbé ak lòt gwo fonksyonè leta nan konplisite ak gang.
Veteran politisyen André Michel ekri sou rezo sosyal X ke dènye atak sou Gressier a moutre ke “Ayiti pap ka soti anba gang yo san yon fòs entènasyonal. … Nou menm sèl p ap kapab bay peyi a sekirite.”
Deplwayman fòs miltinasyonal la ke l-ONU apiye pou Ayiti a, e ki pwal gen nan tèt li polisye peyi Kenya gen reta plizyè fwa, men kèk moun kwè ke premye ajan polis yo ka debake ann Ayiti nan fen mwa Me a.
Plizyè avyon militè Ameriken ateri nan ayewopò entènasyonal Pòtoprens la nan nan semèn ki sot pase yo malgre li fèmen, kote yo pote kontraktè sivil, materyèl imanitè, materyo konstriksyon ak ekipman lou anvan arive fòs miltinasyonal la.