Prensipal tribinal Nasyon Zini an òdone Izrayèl ayè jedi a nan yon dekrè ki gen fòs yon lwa pou li ouvè plis pasaj atè pou kite plis èd imanitè antre nan Gaza pou ede Palestinyen ki nan famin sou teritwa a.
Lòd la ki soti nan Tribinal Jistis Entènasyonal-la nan LaHè di Izrayèl pou li pran “tout bon jan mezi ki nesesè pou asire, san pèdi tan,” ke sèvis de baz ak èd imanitè antre ann ijans,” antwòt manje, dlo, gaz ak materyèl medikal.
Tribinal la òdone tou pou Izrayèl asire imedyatman “ke lame li pa komèt anyen ki se yon vyolasyon kont nenpòt dwa Palestinyen yo nan Gaza kòm yon gwoup ki anba pwoteksyon Konvansyon sou Prevansyon ak Pinisyon pou Krim Jenosid, kidonk destriksyon tout yon popilasyon, antwòt nan aksyon pou anpeche livrezon asistans imanitè ke moun yo bezwen ann ijans.”
Tribinal la òdone tou pou Izrael bay rapòt nan yon mwa pou pi pi plis sou kouman li ap aplike lòd yo.