Dezòd ak latroublay gang ann Ayiti ogmante pi plis nan semèn ki pase yo, kote anpil kout zam marye nan kapital la, pandan gen gwo vag atak sou enstitisyon leta yo, antwòt sou komisarya polis yo ak ayewopò entènasyonal Potoprens la.
Premye Minis Ariel Henry te anonse nan dat 11 mas lap bay lèt demisyon li lè gen yon konsèy prezidansyèl tranzisyon ki enstale, dapre yon akò ke plizyè sektè politik te rive jwenn ak CARICOM.
Wo Komisè Nasyonzini pou Dwa Moun Volker Turk bay yon deklarasyon ki soti ansanm ak yon rapò Nasyonzini ki dekri sa li rele sitiyasyon dezas ann Ayiti. Li di : "Tout pratik sa yo veksan amò e yo dwe sispann touswit."
Rapò a gen dokiman sou 4,451 asasinay ki fèt ane pase ak 1,554 ane sa a jiska 22 Mas nan moman vyolans la ogmante.
Gen moun ki mouri lakay yo poutèt swadizan sipò yo bay lapolis oswa gang rival.
Gen lòt moun ki pèdi lavi yo nan lari anba bal fran-tirè oswa bal mawon lè gwoup bandi ap tope kòn yo. Rapò Nasyonzini an di tou youn nan viktim yo se yon ti bebe twa mwa.
Brigad ame ki ap bouche twou vid kote lapolis pa fè travay li te touye 528 moun ke yo sispèk nan koneksyon ak gang ane pase e gen 59 ki mouri jiska prezan ane sa a nan menm kondisyon an.
Menm Rapò sa di gang yo ap rekrite timoun ann Ayiti, e ke yo konn sèvi ak ti gason pou enfòme yo nan ka kidnaping ak vòlè, e ke yo konn pran tifi pou fè travay nan kay oswa kòm espyon.
Gen timoun ki eseye sove e yo egzekite yo.
Rapò a mande yon pi bon kontwòl lapolis nan kago ki ap antre ann Ayiti, ki ka pote zam nan kontrebann, malgre yon anbago Nasyonzini.
Turk te fini pou li "Se chokan ke malgre sitiyasyon an terib sou tèren an, anpil zam kontinye ap antre."