Deklarasyon an, ki gen siyati 8 manm yon konsèy ki ta dwe gen 9 manm, parèt kòm yon siy ke chire-pit ki te gen nan nominasyon manm yo ap fini e ke konsèy la ka fè travay ofisyèl li talè konsa.
“Nou gen detèminasyon pou nou soulaje soufrans pèp ayisyen an ki bloke depi lontan anba move gouvènans, yon vyolans ki devaste popilasyon an tout jan, ak yon gouvènman ki meprize vizyon pèp la ak bezwen li,” se sa deklarasyon an di.
Manm yo fè wè ke depi konsèy la enstale ofisyèlman, li pwal ede « remete Ayiti sou wout pou li gen otorite lejitim dapre prensip demokratik, e pou li gen estabilite ak diyite.”
Deklarasyon an vini preske yon mwa apre gang te koumanse vize kèk enfrastrikti kle nan leta toupatou nan Potoprens. Yo boule pòs polis, tire sou prensipal aewopò peyi a, ki rete fèmen depi lè a, e anvayi 2 pi gran prizon peyi a kote yo lage plis pase 4.000 prizonye.
Anpil moun pèdi lavi yo, e 17.000 lòt rete nan lari.