Òganizasyon ''Doctors of the World'', Doktè pou Mond la, te vizite moun ki kite kay yo e ki rete nan yon kan nan "Lycee des Jeunes Filles", nan kapital Ayiti a Pòtoprens, nan dat 26 mas 2024 la nan moman avni politik peyi a pandye akoz gang ame kap laji kontwòl yo sou vil la, e e ki ap chache rive pi lwen toujou.
Repòtè pou ajans nouvèl Reuters te wè nan sant medikal ke medsen yo tabli pou sikonstans la yon liy manman ak pitit e ak granmoun ki ap tann pou yo fè estaf medikal la tchèke yo epi ba yo medikaman preskripsyon nan yon efò pou anpeche kriz sosyal la vin pi grav.
Vyolans gang yo lakoz lanmò plizyè milye sitwayen epi fòse plizyè santèn milye lòt kouri kite kay yo.
Neg ak zam atake estasyon lapolis ak ayewopò entènasyonal Toussaint Louverture la, sa ki lakoz vòl komèsyal sispann jiska jounen jodi a.
Oganizasyon entènasyonal yo te di semèn pase a prèske mwatye nan pèp Ayiti ap lite pou yo manje pandan vyolans gang gaye nan tout peyi a, ak plizyè zòn ki pre tonbe nan grangou. Enflasyon ki gen nan peyi a ak move rekòt yo te tou pouse Ayiti atnre nan pi move nivo ensekirite alimantè ke peyi a janm konnen.
Lidè rejyonal yo ap eseye fòme yon konsèy tranzisyon apre Premye Minis Ariel Henry te pwomèt pou l demisyone depi yo fòme konsèy la.
Men, kounye a PM nan bloke aletranje, li pa kapab retounen nan peyi a apre li te vizite Kenya pou diskite sou deplwaman yon fòs sekirite entènasyonal.