Lame Izrayèl la rapòte desant dè lye jodi madi-a nan zonn Khan Younis nan sid Gaza, pandan otorite Palestinyen yo di frap izraelyen menm kote a touye pou pi piti 17 moun.
Otorite palestinyen yo di frap yo fèt toupre Lopital Ewopeyen an nan katye Hamad.
Lame Izrael la di li te vize enfrastrikti teworis nan Hamad, e ke li arete dè douzèn konbatan Hamas ak Jihad Islamik ki te kache nan mitan sivil.
Batay te kontinye nan Gaza pandan gen efò san pran souf pou jwenn yon pòz nan konfli a, ak chita-koze ann Ejip.
Izrael pa mete pye nan negosyasyon ki ap dewoule nan vil Kèr, kapital Ejip la, e li akize Hamas kòmkwa se li ki pa bay lis non otaj ke militant yo gen anba men yo toujou.
Yon gwo dirijan Hamas di jounalis yo jodi madi a se Premye-minis Benjamin Netanyahu ki pa vle fè antant, e ke se alye Izrael, Etazini, ki dwe fè li aji.