Lidè Majorite nan Sena Etazini an di lendi li gen rekonesans pou yon deklarasyon pi solid ki soti bò kote LaChin pou kondane Hamas deske li touye epi kidnape sivil israelyen ak etranje.
Schumer te pale konsa nan yon vizit ke palmantè 2 pati politik yo nan Kongrè ameriken an te fè nan Peken, kote yo te rankontre ak Prezidan Xi Jinping.
Schumer te nan tèt yon delegasyon 6 senatè ki te ale an Chin pou fè chita-koze nan kad efò pou estabilize relasyon ant 2 peyi yo ki vire an bankal nan ane ki pase yo sou kesyon komès, sipò Etazini pou Taiwan ki ap gouvène tèt li, dwa moun ak lòt kesyon.
Delegasyon an ki gen ladann 3 Demokrat ak 3 Repibliken, sete premye vizit palmantè ameriken depi 2019 e li fèt nan yon moman kote Kongrè a ogmante atak sou LaChin pandan Etazini ap fè fas ak Peken ki ap moute kòm yon pwisans mondyal.