Lajitis nan peyi Espay mande ansyen Prezidan Federasyon Foutbòl Panyòl la, Luis Rubiales pou li konparèt devan tribinal Vandredi nan kad ankèt yap menen kont li apre li te bo sou bouch san konsantman l, jwèz Jennifer Hermoso apre ekip la te ranpòte mondyal la.
Luis Rubiales sipoze parèt devan tribinal Vandredi a midi - 12:00 p.m. (10:00 GMT) yon jij pral tande li nan kad ankèt ke yap mennen kont li. Li va gen pou l reponn kesyon sou akizasyon "atak seksyèl" devan tribinal la pandan Odyans Nasyonal la.
Se sou demand pakè a ke Jij Francisco de Jorge te dakò pou yo kòmanse yon pwosè kont Luis Rubiales pou "atak seksyèl" ak "krim fòse" an koneksyon ak Jenni Hermoso.
Biwo pwokirè Panyòl la, ki te louvri yon ankèt preliminè 28 out pase a sou dosye sa a. Yo te mande pou tribinal la tande Rubiales kòm akize, epi Jennifer Hermoso kòm viktim, apre jwèz la te fin depoze yon plent kont ansyen prezidan an.
Anons tribinal la vini 2 jou apre Luis Rubiales te remèt demisyon li nan tèt federasyon an.