"Nou dwe ranfòse koperasyon estratejik, fè tout peyi travay kòmsadwa ak òganizasyon entènasyonal yo, ankouraje lide pou peyi an devlopman yo gen plis reprezantasyon nan gouvènans mondyal la." Pawòl prezidan chinwa a Xi JINPING nan yon reyinyon anvan somè a.
Prezidan Chinwa Xi Jinping rive nan Johannesburg Lendi 21 Dawout 2023 pou al patisipe nan 15yèm somè BRICS la epi fè yon vizit deta nan Afrikdisid. Prezidan Sid Afriken Cyril Ramaphosa, ak Minis Relasyon Entènasyonal ak Koperasyon Afriken an Naledi Pandor, ak kèk lòt manm gouvènman an te al akeyi Xi nan Ayewopò Entènasyonal Tambo nan Johannesburg. Prezidan Ramaphosa te akeyi Xi Jinping avèk anpil kè kontan pou vizit deta li nan Afrikdisid. Xi bò kote pal te di ke li kontan anpil pou l vizite
Afrikdisid ankò e li espere li pral gen yon boukantay lide an pwofondè ak Ramaphosa pou rive nan relasyon pi pwofon ant Lachin ak Afrikdisid, 2 peyi ki gen pwoblèm ak enkyetid komen. Prezidan chinwa a voye salitasyon sensè li ak tout bon swè li bay gouvènman SidAfriken an ak pèp li a nan non gouvènman Chinwa a.
Plizyè manm BRICS ateri nan Johanneburg pou patisipe nan 15yèm somè sa a, pami yo prezidan Brezil, Luiz Inacio Lula da Silva, ak madanm li Rosangela da Silva, Minis afè etranjè ris Sergey Lavrov ki reprezante prezidan Vladimir Putin, ak Premye-minis End Narendra Modi.
Lidè peyi BRICS yo - Brezil, Larisi, End, Lachin ak Afrik di Sid - reyini pou evalye lide pou laji blòk la pandan kèk manm ap chache fè l tounen yon gwoup pou balanse enfliyans Lwès la. Tansyon mondyal ki ogmante akoz lagè a nan Ikrèn, ansanm ak yon rivalite k ap grandi ant Lachin ak Etazini, vin ajoute sou nesesite ijan pou ranfòse blòk la, ki te konn fè fas ak divizyon nan mitan li ak yon mank vizyon.
Prezidan Afrikdisid, Cyril Ramaphosa, di:
"Afrikdisid ak Lachin gen menm pozisyon sou kesyon pou ogmante peyi manm BRICS yo, epi nou paka tann diskisyon nou pral genyen ak lòt lidè BRICS yo jodi a nan somè sa a".
Pwofesyonèl medya SidAfriken yo bat anpil bravo pou yon atik Prezidan Chinwa Xi Jinping siyen ki parèt nan medya SidAfriken nan Lendi. Nan atik la, Xi pwomèt pou l fè nouvo pwogrè nan bati yon kominote Lachin-Afrik ki gen yon avni komen nan epòk kounyea.
Austin Thomas, Jounalis nan Jounal Awoko di:
"Nou vle BRICS ede peyi andevlopman yo, espesyalman ann Afrik, paske se Afrik ki gen plis peyi andevlopeman. Kidonk nou vle pou peyi BRICS yo vin pi fò pou yo ka ede Afrik devlope."
Prezidan Chinwa Xi Jinping di nan lang mandarin:
"Mwen ta renmen repete ke kèlkeswa jan sitiyasyon entènasyonal la devlope, detèminasyon Lachin nan apwofondi relasyon zanmitay ak koperasyon ant Lachin ak Afrikdisid pa pral chanje."
Somè BRICS la ap fèt nan Johannesburg soti madi 22 Dawout pou bout jedi 24 Dawout 2023 a.
BRICS se yon gwoup peyi ki gen ladann Brezil, Larisi, End, Lachin ak Afrikdisid. Peyi BRICS yo gen plis pase 40 pousan popilasyon mondyal la ak apeprè yon ka nan ekonomi mondyal la. Dapre dirijan BRICS yo, anviwon 40 peyi an devlopman vle rantre nan gwoup la, e 23 nan yo deja aplike.