Pandan yon entèvyou li te bay yon stasyon televizyon nan peyi La Grès, ansyen Prezidan Etazini Barack Obama konpare kouvèti laprès bay disparisyon ti soumaren Titan an ak sa yo bay 700 migran ki mouri sou lanmè sa pa gen lontan.
"Mwen kwè pwojè ki enpòtan pou tout demokrasi se akonpaye moun ke globalizasyon an kite dèyè - kitse nan domen edikasyon oubyen fòmasyon jenès la, pwoteksyon sosyete a oubyen asistans etranje. Kriz migratwa ki frape Lagrès la gen gwo enpak sou peyi a depi 15 zan. La Grès pata dwe ap jere sa poukont li. Kominote entènasyonal la gen responsabilite pou sikonstans ki lakoz moun dezespere pran lanmè pou vin lakay nou. Nou paka vire do nou bay moun sa yo. Mwen kwè si w gade sak pase semèn sa a, gen yon potansyèl trajedi kap dewoule anba lanmè ak yon soumaren. Laprès ap kouri l chak minit, toupatou nan mond lan - e se yon bagay nou ka konprann paske nou tout ap lapriyè ke yap kapab sove moun sa yo. Men verite a se ke nouvèl sa a ranpòte plis atansyon pase 700 moun ki te mouri neye - e se yon bagay ki pa akseptab. Nosyon ke nou paka fè anyen se pa vre ditou - e nou konnen nou ka fè yon bagay. Paske gen peyi ki jwenn yon bon ekilib kote tout moun santi yo fè ase."