Maduro te adrese mesaj sa bay prezidan Kolonbyen Gustavo Petro ak reprezantan plizyè peyi ki pral patisipe nan yon somè ki ap fèt nan kapital Kolonbi a Bogota madi 25 avril pou eseye rekòmanse chita pale ant gouvènman venezuelyen an ak opozisyon an anvan eleksyon 2024 yo ki gen pou vini.
Prezidan venezuelyen an mande nan rapò somè a pou patisipan yo mande akonplisman 'akò sosyal' yo te rive jwenn sou tab ak opozisyon an nan Meksik an 2022.
Akò sa te gen ladann kreyasyon yon fon 3.2 milya dola ak resous byen Venenzyela ki jele nan sistèm finansye entènasyonal la, ke Nasyonzini ta dwe administre pou kèk plan imanitè nan peyi a.
Maduro te akize tou anbasadè ameriken nan Venezyela James Story kòmkwa li te ede lidè opozisyon Juan Guaido vwayaje nan Kolonbi pou chache patisipe nan somè a.
Byen bonè nan Lendi, Guaido te poste yon tweet ki di li te rive Bogota pou mande reyinyon ak delegasyon entènasyonal yo. Ministè Afè Etranjè Kolonbi a te voye enfòmasyon byen vit pou fè konnen Guaido pa te yon envite nan somè a.