Ansyen prezidan ameriken Donald Trump di si yo kondane l pou yon krim, li ap toujou rete kandida pou prezidan an 2024, sa se deklarasyon li nan yon entèvyou ki te pase nan pwogram 'Tucker Carlson Tonight' sou chèn televizyon Fox News.
« Mwen pap janm kite sa. Non, mwen pa janm kite sa. Se pa bagay mwen konn fè. Mwen p ap fè sa, » se sa Trump te di Carlson sèlman kèk jou apre yon tribunal nan Manhathan te lage sou do li 34 akizasyon krim ki gen rapò ak dosye biznis li yo.
Semèn pase a, Trump te plede non koupab pou tout 34 akizasyon krim yo.
Lajistis akize l kòmkwa li te fè aranjman pou peye 2 fanm anvan eleksyon 2016 la pou anpeche yo pale nan laprès sou relasyon seksyèl li te gen ak yo.
Trump, ki gen 76 an, di ke se opozan politik ki ap sèvi ak sistèm jistis la kont li pou chache anpeche l repran Mezon Blanch la.
Nan menm entèvyou a, Trump te fè lwanj lidè yo nan Larisi, Lachin, ak Kore di Nò kòm lidè ki sipè entelijan.