Otorite franse yo wè lapolis kòm avoka gouvènman an ki ap asire ke sitwayen yo manifeste pasifikman kont desizyon Prezidan Emmanuel Macron pou ogmante laj pansyon an.
Men moun k ap defann dwa moun ak manifestan ke lapolis bat oubyen benyen ak gaz lakrimojèn, di ke ajan polis yo depase limit misyon yo.
Pandan dè mwa depi kokenn pwotestasyon te koumanse gaye an Frans kont chanjman ke gouvènman an te pwopoze nan sistèm pansyon an, kèk ajans fòs lòd tonbe anba akizasyon kòmkwa yo fè britalite san rezon. Yon msye nan Pari pèdi testikil li anba kout baton yon polisye, e yon grenad pran dwèt pous yon dam nan Rouen. Yon travayè ray tren pèdi yon je akoz moso grenad ki frape li.
Vyolans la ajoute sou kolè nan lari a e konplike efò pou mande dyalòg ant gouvènman an ak sendika asosyasyon pwofesyonèl yo, ki ap planifye yon 11èm seri manifestasyon sou beton an jedi sa a.