Sèvis sekirite FSB Larisi a di jedi 30 mas li arete yon repòtè jounal ameriken The Wall Street Journal ke li sispèk kòmkwa li t ap fè espyonaj pou Washington. Se aksyon piblik ki pi grav ke yo pran kont yon jounalis etranje depi Larisi te anvayi Ikrèn nan mwa Fevriye ane pase.
Jounal la di arestasyon sitwayen ameriken Evan Gershkovich te baze sou fo akizasyon.
Aksyon sa pral agrave move relasyon ki deja ekziste ant Larisi ak Etazini, ki se pi gwo sipòtè Ikrèn militèman e ki te enpoze sanksyon sou Moskou pou eseye konvenk li pou l retire twoup li yo. Kremlin an pa montre okenn siy ke li pwal fè sa.
FSB di nan yon deklarasyon li ouvè yon dosye kriminèl kont Gershkovich ke otorite yo sispèk nan espyonaj, e yo akize l kòmkwa li ap ransanble enfòmasyon klase kòm yon sekrè leta sou faktori yo nan sistèm endistri militè ris la.
Li pa bay non faktori a ni di kote li ye, men li di li arete jounalis 31 lane a nan vil Urals nan rejyon Yekaterinburg pandan li te ap eseye pran enfòmasyon sekrè.
FSD dekare "Li te gen prèv ke E. Gershkovich, te aji sou lòd Ameriken kote li rasanble enfòmasyon sekrè leta sou aktivite nan youn nan enstalasyon ki nan sistèm militè-endistriyèl Larisi a."
Wall Street Journal di nan yon deklarasyon li “gen anpil kè-sote” pou sekirite Gershkovich a e ke li "nye akizasyon FSB a ak tout fòs”.
Pòtpawòl Ministè Afè Etranjè Ris, Maria Zakharova, di aktivite Gershkovich nan Yekaterinburg "pa gen rapò ak travay jounalis" e ke se pa premye fwa pran pòz jounalis etranje kòm kouvèti pou yo regle lòt aktivite.
Anbasad Ameriken an nan Moskou di li pa gen okenn kòmantè pou li fè touswit.
Yon sous diplomatik ameriken di ke anbasad la pa t enfòme sou ensidan an e ke li t ap chèche enfòmasyon bò kote otorite Ris yo sou ka a.