Foutbol

Seleksyon Nasyonal Feminen Ayiti ap Fè Preparasyon pou 2 Match nan Peyi Tiki

Seleksyon Nasyonal Ayiti nan faz eliminatwa Kou di Mond Feminen an nan Auckland, La Nouvel Zeland, 18 Fevriye 2023.

Seleksyon nasyonal feminen Ayiti a, ki te jwenn kalifikasyon l pou pwochen mondyal kap fèt nan peyi Ostrali ak Nouvèl Zeland nan dat 20 jiyè pou rive 20 dawout ap lanse preparasyon yo a travè yon staj soti nan dat 3 avril pou rive 11 avril nan vil Antalya nan peyi Tiki.

Pandan staj sa, Grenadyè yo ap tou profite jwe 2 match preparasyon ak 2 lòt peyi ki te kalifye pou pwochen mondyal la tou.

Yon fason pou seleksyonè a, Nicolas Délepine gen plis lide sou ansanm jwez ki nan ekip la epi kenbe yo nan bon kondisyon.

Ayiti ki okipe 55e plas nan dènye klasman FIFA te pibliye an, ap gen pou li jwe premye match amikal li kont Nigeria (45e mondyal) nan 7 avril epi l ap twoke kòn li tou ak seleksyon Moldavi a (110e mondyal) nan dat k ap 11 avril la.

Pote pa yon gran Melchie Daëlle Dumornay, seleksyon nasyonal feminen Ayiti ki kalifye pou premye fwa nan istwa koup di mond nan nivo senyò, ap gen pou l jwe nan group D a ki genyen ladann : Angletè, Dànmak ak ekip Chinwaz la.

Kalandriye match Ayiti yo nan koup di mond lan:

Ayiti vs Angletè 22 jiyè 2023 nan Brisbane Stadium (Brisbane, Ostrali)

Ayiti vs Chin 28 jiyè 2023 nan Hindmarsh Stadium (Adélaïde, Ostrali)

Ayiti vs Dannmak 1 dawou 2023 nan Perth Rectangular Stadium (Perth, Ostrali)