Prezidan Jair Bolsonaro di mèkredi sondaj ki montre opozan de goch li a, Luiz Inacio Lula da Silva, ap mennen nan kanpay pou eleksyon prezidansyèl ki gen pou fèt nan mwad oktòb la nan Brezil se " manti." Bolsonaro fè deklarasyon sa a nan yon diskou li pwononse pou make Fèt Endepandans peyi a.
Lidè brezilyen an te pran lapawòl devan yon gwo foul moun ki te prezan pou asiste aktivite yo apre li te prezide yon gwo parad militè. Nan diskou a, li prezante batay elektoral ki divize sitwayen brezilyen kòm "yon batay ant le byen ak le mal."
Bolsonaro pwomèt pou l pa kite Lula "repran tèt peyi a." Li pale tou de akizasyon koripsyon k ap peze sou do ansyen prezidan an, akizasyon ki soulve gwo pale anpil. Lula te dirije Brezil ant 2003 e 2010.