Kiba mande Lezetazini ba li asistans teknik pou ede l repare yon gwo izin ki sèvi kòm depo petwòl apre yon gwo kokenn dife te pran nan enstalasyon sa a, kote 16 moun te pèdi lavi yo. Ministè Afè Etranjè Kiba a fè konnen espesyalis kiben ak ekspè Ajans Ameriken pou Pwoteksyon Anviwonnman an (EPA) deja rankontre pou yo te abòde posiblite pou yo “anvizaje mwayen pou yo kowopere pou remete ann eta pati ki plis domaje nan izin nan” ki sitiye nan vil Matanzas, nan pati lwès Kiba.
Ministè Afè Etranjè a dekri rankont la kòm “yon echanj pwofesyonèl e pozitif” e li fè konnen manm delegasyon Kiba a poze kesyon sou teknik ak pwosede ki pi inovantè EPA konn itilize e yo mande non konpayi ki abitye patisipe nan netwayaj kalte dezas konsa. Pi bonè mwa sa a, yon kout loraj te tonbe sou zòn nan e li te pwovoke dife nan depo petwòl la nan Matanzas, sou yon distans100 kilomèt avèk La Avàn.
16 ponpye te pedi lavi yo pandan yo t ap eseye touye dife a tandiske plis pase 130 lòt moun te blese. Gouvènman kiben an di li konsidere se pi move dife ki frape peyi a nan tout istwa Kiba. Gouvènman Meksik ak Venezuela te depeche kèk ekip pou yo te ede ponpye kiben yo konbat dife a. Lèzetazini te ofri asistans teknik li pa telefòn.
Kèk nan enfòmasyon ki nan repòtaj sa a sòti nan Reuters ak Ajans France-Presse.