Otorite yo nan Ikrèn di kèk misil lame Larisi lanse jedi 14 jiye a al frape vil Vinnytsia, nan sant Ikrèn, kote yo touye 20 moun pou pi piti epi blese 90 lòt konsa.
Dapre lapolis, 3 misil al tonbe sou yon biwo leta nan mitan vil la ki sitiye sou yon ditans 70 kilomèt o sidwès kapital la, Kyèv. Misil sa yo, ki te sòti sou yon soumaren ris ki nan Lanmè Nwa a, domaje plizyè bilding rezidansyèl nan zòn nan e yo mete dife nan 50 machin ki te nan yon paking tou pre a.
Gouvènè rejyon Vinnytsia a, Serhiy Borzov, deklare sistèm defans ikrenyen an rive desann 4 lòt misil nan menm zòn nan.
Avèk yon popilasyon 370 mil moun, Vinnytsia se youn nan pi gwo vil nan Ikrèn. Plizyè santèn moun k ap viv nan pati lès peyi a, kote Larisi konsantre atak li yo, pati kite rejyon an depi lagè a te kòmanse nan fen mwa fevriye pase a.