Gouvènman ameriken an pral anile 6 milya dola yon afè de 200 mil etidyan te prete pou peye etid yo, paske etidyan sa yo pretann ke inivèsite yo te vòlè kòb yo. Administrasyon Prezidan Joe Biden nan fè anonse sa a jedi apre yon aranjman ant etidyan yo ak Depatman Edikasyon Nasyonal, aranjman yo te soumèt mèkredi devan Tribinal Sivil Kalifòni an, Distri Nò, e ki dwe jwenn apwobasyon yon jij federal.

Anilasyon dèt etidyan yo tounen yon priyorite pou politisyen liberal yo e se yon sijè ki byen kapab vin popilè, anvan eleksyon lejislatif mi-manda mwa novanm, nan mitan jwenn jenerasyon an ak pami elektè ki edike yo e ki plis anbrase ideyoloji Pati Demokrat la.

Anviwon 43 milyon etidyan ameriken gen dèt federal pou yo peye, daprè educationdata.org. Prè lajan etidyan sa yo pral efase totalman e leta federal pral ranbouse yo tout vèsman yo te deja fè: se sa ki di nan yon dokiman tribinal la deja prepare sou aranjman an.

Nan plent etidyan yo te pote nan tribinal, yo te akize ni administrasyon Biden nan ni administrasyon Trump la deske yo te ranvwaye pandan plizyè ane tout aksyon sou aplikasyon etidyan yo te ranpli epi soumèt devan Depatman Edikasyon an pou yo te ka jwenn yon soulajman anba dèt yo.

Nan yon deklarasyon Minis Edikasyon an, Miguel Cardona, pibliye mèkredi, li di li konsidere anranjman an kòm “yon antant ki jis e ekitab pou tout pati konsène yo”. Daprè li, se yon aranjman ki pral pote plizyè milya dola soulajman otomatikmaan pou 200 mil moun.

Anvan sa, administrasyon Biden nan te apwouve yon sòm 25 milya dola kòm lajan dèt li te efase pou anviwon yon milyon 300 mil ansyen etidyan. Depi kèk tan deja, li yon ti jan ap ezite pou l pran pou kont li yon desizyon pou l anile dèt ke tout ansyen inivèsitè genyen pou gouvènman federal la. Olye de sa, prezidan an deja mande Kongrè a pase yon lwa ki afase dèt yo, men fòk se yon lwa li kapab siyen.