Washington - Minis komès ameriken an, Gina Raimondo, ki t ap pale dimanch sou chèn televizyon CNN, fè konnen Prezidan Joe Biden mande ekip gouvènmantal li a etidye posiblite pou Lèzetazini ta leve kek nan tarif k ap peze sou pwodui chinwa yo depi sou administrasyon Donald Trump la, yon fason pou konbat yon enflasyon ki rive nan yon wo nivo.
Madam Raimondo deklare:
“Nap konsidere posiblite a. An fèt, Prezidan an mande nou menm ki nan ekip li a analize posiblite a. Alòs, nou lanse yon pwosesis kote n ap fè sa l mande a epi nou va kite li pran desizyon final la.”
Minis la ajoute: “Gen lot pwodui –tankou pwovizyon pou kay, bisiklèt, etc… nou ka konside pou n leve tarif yo… Administrasyon an deside kenbe kek nan tarif yo sou asye ak aliminyòm pou l ka pwoteje travayè ameriken yo ak endistri asye a.”
Prezidan Biden te fe konnen l ap anvizaje posiblite pou l elimine tarif ki vo plizye milya dola Lèzetazini te enpose sou pwodui chinwa yo an 2018 ak 2019 sou gouvènman Trump la nan moman 2 pi gwo ekonomi nan lemond yo te mele nan yon gwo gè komèsyal.
Lachin pa sispann di si Lèzetazini redui tarif yo, sa ka bese depans yo pou konsomatè ameriken yo.