Apre ronkont sa a, ki te dire 3 èdtan nan Sochi, Prezidan Sall di jounalis yo: "Nou kite isit la trè rasire e trè kontan de echanj nou te genyen yo" .
E li ajoute li panse prezidan ris la konsyan e "okouran ke kriz la ak sanksyon yo kreye anpil pwoblèm grav sou ekonomi peyi ki fèb yo, tankou ekonomi afrikèn yo".
Mesye Putin site "plizyè mwayen pou l fasilite ekspòtasyon yo, swa atravè pò Odessa a, swa atravè pò Mariupol la", ki rekòmanse travay sa pa gen lontan.
Nan kòmansman rankont la, Misye Sall, ki te gene avèk li chèf Komisyon Inyon Afriken an, Chadian Moussa Faki Mahamat, te mande Vladimir Putin pou l pran konsyans epi "reyalize" ke Lafrik se yon "viktim" sitiyasyon an.
Mesye Sall fè remake ke "majorite peyi afriken yo" te "evite kondane lagè Larisi a" nan 2 vòt ki te fèt nan Nasyonzini, e anpil peyi nan rejyon "Azi, Mwayen Oryan ak Amerik Latin nan, te deside fè abstansyon pou yo kapab rete lwen konfli yo."
Prezidan senegalè a note tou ke sanksyon loksidan mete sou komès ak chèn finansye yo nan Larisi vin agrave tansyon ki egziste nan domèn alimantè a. Se poutèt sa, li mande pou yo wete sektè manje a "anba sanksyon" ke loksidan enpoze kont Moskou yo.
Macky Sall di li panse sitiyasyon sa a kreye "menas grav pou sekirite alimantè a sou kontinan an." Akoz pinisyon sa a, "nou pa gen aksè ak sereyal ki soti nan Larisi ankò, men sa nou plis pa ka jwenn, se angrè."
Vladimir Putin, bò kote l, pa abòde sijè sa a piblikman nan rankont la. Yon lòt kote, li raple "sipò" Inyon Sovyetik la te bay peyi afriken yo "nan batay yo t ap mennen kont kolonizasyon" e li fè lwanj pou pwogrè ki fèt nan relasyon and Larisi ak eta afriken yo.