Prezidan Sèbi, Aleksandr Vucic, refize kondane klè envazyon LaRisi nan Ikrèn nan, e peyi li pa pa antre nan lojik sanksyon loksidan pran kont Moskou yo. Vucic di li vle Sèbi antre nan Inyon Ewòp la, men li pase kèk ane ap simante relasyon li ak LaRisi ki se alye li depi lontan.
2 peyi yo ka siyen kontra a pandan yon vizit Minis Afè Etranjè ris la, Sergei Lavrov, pral fè nan kapital Sèbi a, Belgrad, nan koumansman mwa jen an - se raman yon otorite ris wo-plase vizite yon peyi ewopeyen depi envazyon Larisi nan Ikrèn nan te tanmen 24 Fevriye pase a.
Vucic fè konnen li di Putin li ta renmen wè "lapè tabli depi sa posib." Sèbi depann preske antyèman de gaz ris la, e Moskou posede pi fò aksyon nan prensipal konpayi enèji peyi sa a.
Li pa klè ki jan Sèbi ap resevwa gaz ris la si Inyon Ewòp la deja fèmen tiyo gaz k ap travèse peyi manm li yo. Larisi deja bloke ekspòtasyon gaz pou 3 manm Inyon an ki se Fenland, Polòy ak Bilgari.