Mari yon pwofesè 4èm ane ki pèdi lavi l nan tire ki te fèt madi a, nan yon lekòl primè nan Tekzas, mouri ak yon atak kadyak, dapre sa fanmi li di jounal New York Times.
Joe Garcia, ki t ap pare pou antèman Irma Garcia, ki te menaj li depi nan lekòl segondè epi madanm li depi 24 lane, tonbe e li mouri sou plas jedi, dapre sa New York Times rapòte.
Nouvèl la di koup la kite dèyè 4 timoun. Madam Garcia, ki te gen 46 zan, se youn nan 2 pwofesè ki pèdi lavi yo nan Lekòl Primè Robb nan bouk Uvalde, nan Texkzas, ansanm ak 19 timoun. Otorite yo fè fanmi yo konnen ke Irma Garcia ak kòlèg li, Eva Mireles, mouri pandan yo t ap chache pwoteje elèv yo.
NBC bay nouvèl lanmò Joe Garcia tou, dapre rapò pitit gason li, Christian Garcia, ak yon neve li, John Martinez, te bay chèn televizyon an.