Gad Kòt Ameriken fè konnen Lendi li anile operasyon li te lanse pou chache sivivan nofraj yon bato ki tap transpote migran Ayisyen e ki lakoz omwens 11 moun mouri.
Yo te dekouvri bato a Jedi pase a o no zile Desecheo, nan Potoriko ak yon kantite "endefini" moun. Gad Kot sove 38 nan yo, e pami moun sa yo te gen 2 moun Repiblik Dominiken.
"Nou prezante kondoleyans nou bay fanmi ak zanmi moun ki pa soti vivan ou ki disparet e nap lapriye pou yo, Kapiten Gregory H. Magee, Komandan Sekte Gad Kot San Juan nan di nan yon deklarasyon li pibliye.
VOA Kreyol mande responsab gad frontye ak la dwan Etazini si gen yon lis non moun ki soti vivan ak sa yo ki mouri. Yo di nou ke pou kounyea, pa gen enfomasyon sa a. Responsab la di yo resevwa plizye demann bo kote fanmi moun ki te nan bato a.
Pandan mwa ki sot pase yo gad kot konstate yon ogmantasyon nan kantite migran kap kouri kite Ayiti pou chape anba zak vyolans gang yo, lamize - e ki riske lavi yo sou lanme nan bato ki pa an mezi pou fe vwayaj sa a.
Enfomasyon pou repotaj sa a soti nan Reuters