Ministè Defans LaRisi a fè konnen jodi mèkredi a 959 solda Ikrèn rann tèt yo, semèn sa a, nan dènye moso teritwa ki te anba kontwòl yo nan vil Mariupol ki anba syèj.
Yon pòtpawòl ministè defans la di jounalis yo ke nan kantite sa a gen 694 ki te rann tèt yo nan 24 è pase yo.
Otorite nan Ikrèn pa konfime chif yo. Minis Defans Ikrèn Anna Malyar te fè konnen lendi a plis pase 260 konbatan te kite dekonm izin asye Azovstal e rann tèt yo bay fòs ris yo, e chif sa yo ale ann akò ak chif ke LaRisi bay yo.
Li pa te klè ki sa ki pwal pase konbatan ikrenyen yo. Yon otorite ris eksprime dout sou yon boukantay total prizonye.
Si Mariupol tonbe anba men LaRusi, yon vil ki, anvan lagè a, te gen 430-mil moun sou kòt nò Lanmè Azov, se ta pi gwo siksè nan ofansiv LaRisi kont Ikrèn nan ki la depi preske 3 mwa.