Minis Trezò ameriken an, Janet Yellen, lanse yon apèl bay peyi alye Lèzetazini yo pou l mande yo ranfòse apui ekonomik yo pou Ikrèn, paske, dapre li, angajman peyi yo pran nan sans sa a pa p ase pou satisfè bezwen de baz Ikrèn.
Nan kèk kòmantè Yellen te prepare pou Fowòm Ekonomik Bruksèl la, li di, alòske Ikrèn pral bezwen yon gwo kantite asistans, pou le moman li bezwen “fon lajan pou l peye sòlda yo, anplwaye piblik yo ak pansyonè yo, menm jann li bezwen jere yon ekonomi ki satisfè bezwen elemantè sitwayen l yo.”
Minis Yellen ajoute “bezwen Ikren sou plan finansye a se yon bagay tre zenpotan”, pandan li fè konpliman pou bravou ak kreyativite otorite peyi a ki pèmèt ekonomi an kontinye fonksyone.
Ikrèn kapab jwenn plis asistans mèkredi nan moman Inyon Ewòp la gen pou l pwopoze yon seri de prè ki kapab ede peyi a jwenn finansman ni a lon tèm, ni a kou tèm pou rekonstriksyon nasyonal li.