Sepandan, lidè ris la pa anonse okenn chanjman nan kanpay militè Moskou lanse a, ni li pa deklare viktwa, sa ki fè moun panse ke envazyon an ki la depi 10 semèn pral kontinye avèk atak sou zòn kote sòlda ikrenyen yo retanche yo nan pati lès peyi a apre Larisi te echwe nan efò li t ap fè pou l ranvèse gouvènman Prezidan Volodymyr Zelenskyy a oubyen okipe kapital la, Kyèv.
Pandan Putin te pran lapawòl nan okazyon parad ki komemore defèt Nazi yo nan fen 2èm Gè Mondyal la, li pale de demand Larisi te fè pou garanti sekirite li kèk mwa anvan envazyon an te kòmanse 24 fevriye pase a, menm lè li te repete plizyè fwa li pa t gen plan pou l anvayi peyi vwazen an. Putin di:
“Peyi l OTAN yo pa t vle tande nou; sa ki te vle di yo te gen lòt plan, jan nou te ka wè sa a. Se klè ke yon preparasyon te sou pye pou lanse yon lòt operasyon mechan nan Donbas, an palan de envazyon peyi istorik nou an, san bliye Krime.”
Otorite Lèzetazini ak lOTAN te rankontre ak ofisyèl ris yo plizyè fwa; men yo te rejte kèk nan demand Moskou yo, tankou egzijans pou Ikrèn te pran angajman pou l pa t janm antre nan lOTAN.