Yon diplomat ameriken fè konnen lendi Lèzetazini kapab relouvri anbasad li nan Kyèv anvan lontan. Dapre sa Chaje d Afè Kristina Kvien di nan yon konferans pou laprès nan Kyèv, Lèzetazini gen pou l tann rezilta yon evalyasyon pwofesyonèl sekirite yo anvan li deside relouvri misyon diplomatik la. Li di:
“Lè yo va di nou ke nou kapab retounen, nou pral retounen.”
Chaje d Afè Kvien deklare diplomat ameriken yo pral kòmanse fè vwayaj la nan kapital Ikrèn nan pandan 2 semèn k ap vini yo. Li ajoute:
“Nou kontan anpil dèske n ap retounen e nou pral kontinye fè tout efò posib sou teren an pou n ede Ikrèn ranpòte laviktwa nan lagè sa a. Kite n di mesaj la pou Larisi se:’Ou echwe!’ Ikrèn toujou rete debou.”
Anbasad amerikèn nan te fèmen anviwon 2 semèn anvan envazyon Larisi a te kòmanse 24 fevriye pase a.