Nasyon Zini fè konnen dimanch l ap mennen yon "operasyon pasaj an sekirite" pou kondi yon afè 1000 sivil Ikrenyen pou fè yo kite izin asye ki anba blokaj fòs ris yo nan vil Mariupol ke lagè fin ravaje.
Operasyon an, ki fèt ak kòdinasyon Komite LaKwa Wouj Entènasyonal ansanm ak otorite LaRisi ak Ikrèn, te tanmen nan izin asye Azovstal samdi a. Biwo l-ONU pou Kòdinasyon Afè Imanitè pa te bay plis detay pou l ka prezève sekirite operasyon sovtaj la.
Prezidan Ikrèn Volodymyr Zelensky te poste yon tweet ki di, "Premye gwoup-la ki gen apeprè 100 moun deja mete tèt pou zòn ki anba kontwòl la. Demen nou pwal rankontre yo nan Zaporizhzhia."
Li kontinye pou l di, "Gras ak ekip nou an, kounyea yo menm ak l-ONU ap travay sou evakyasyon lòt sivil yo ki nan izin nan."
Otorite yo kwè ke gen 2-mil lòt konbatan ikrenyen ki rete nan izin nan, kote yo bloke nan kokenn sistèm nan ki konplike ak yon pakèt labirent e ak santye ki anba sènay fòs ris yo.