Julie DeVuono proprietè Sant Sante Wild Child Pediatric Healthcare ak anplwaye li Marissa Urraro anba akizasyon pou krim fòje fo dokiman, dapre otorite yo.
Otorite yo di 2 medam yo te antre fo enfomasyon sou kat yo nan baz done sou vaksinasyon pou eta Nouyok.
Biwo komisè gouvènman distri nan Konte Suffolk la di medam yo te vann fo kat pou granmoun pou $200 dola e $85 dola pou ti moun.
Otorite yo di yo sezi $900,000 dola kash lakay DeVuono.
Jacinda Ardern premye minis New Zealand lan nan izolman lakay li pou jiska demen madi akoz posiblite ke li te ekspoze ak COVID-19 abò yon vol pou li ale Auckland daprè sa otorite yo di samdi ki sot pase a.
Premye minis la pa gen oken sentòm e biwo li di ke li santi li byen. Li te gen pou-l teste pou virus la yè dimanch la.
Nan peyi End, ministè sante fè konnen yè dimanch la gen 234 mil 281 moun ki teste pozitif nan yon period 24 trè .
Pandansetan, Larusi rapòte plis pase 100,000 ka koranavirus pou yon jounen pou premye fwa depi samdi nan moman varyan Omicron nan ki atrapan anpil ap vale teren nan tout peyi a. Gwoup travay gouvènman an rapote yon kantite rekò byen wo ki se 113 mil 122 nouvo ka -- yon ogmantasyon ki 7 fwa la valè konpare ak komansman mwa janvye a.