O Meksik, responsab yo nan Eta Veracruz di yo jwenn kadav majistra eli yon ti rejyon ak 2 kadav zanmi l kèlke zè apre nèg ame te kidnape yo. Komisè gouvènman Eta a, Salvador Mikel Rivera, fè jounalis konnen bandi moun pa idantifye te kidnape majistra Gregorio Barradas Miravete, plis asistan n ak pòtpawòl li nan yon restoran nan rejyon Juan Rodriguez Clara. Dapre otorite yo, apre sa yo te vinn jwenn yon machinn nan eta Oaxaca avèk kadav 3 nèg yo.
Yon lòt kote, Depatman Lajistis ameriken an fè konnen efò otorite Lèzetazini yo ap fè pou yo anpeche zam ki fabrike nan peyi a al tonbe anba men meksiken k ap fè lagè ki makonnen ak trafik dwòg nan peyi yo, eben, efò sa yo rankontre difikilte akoz move travay yon ajans federal ameriken ki responsab pou remonte filyè zam sa yo e sezi yo. Yon rapò ki soti nan biwo Minis jistis ameriken an fè konnen ajans ki rele “Biwo Alkòl, Tabak, Zam ak Eksplozif la kite anpil twou vid nan plan li genyen pou l anpeche komès zam fèt sou fwontyè Lèzetazini avèk Meksik.