Tanpèt Tomas nan Karayib la evolye pou l tounen yon siklòn pandan l ap kontinye sou yon wout k ap Mennen l nan peyi Dayiti ke tranblemanntè 12 janvye a fin ravaje.
Sant Nasyonal Siklòn nan fè konnen Tomas ap woule ak yon van ki soufle ak yon vitès 130 kilomèt a lè, sa k fè l tounen yon siklòn kategori 1 sou nechèl la ki gen 5 pwen, ki mezire fòs yon tanpèt ak posiblite pou l fè dega.
Avètisman siklòn nan an vigè pou Ayiti, Bahamas, Zil Turk ak Caicos, ak Guantanamo, Kiba.
Teknisyen meteyo yo fè konnen tanpèt la pwal lage 25 santimèt lapli sou Ayiti, sa k ka deklanche inondasyon ak eboulman k ap menase lavi moun.
Gouvènman ayisyen an ak gwoup k ap bay èd yo ap batay pou yo deplase sivivan tranblemanntè mwa janvye a pou fè yo kite kan yo ki chaje moun, e fè yo ale nan abri ki pi solid.
Nasyonzini fè konnen dlo inondasyon yo ki kontaminen ak kondinasyon sanitè yo ki pa bon ka agrave epidemi kolera a nan peyi Dayiti ki déjà touye plis pase 440 moun.
Gwoup k ap bay èd yo ap anpile pwovizyon sekou nan tout peyi a. LONU mande kominote entènasyonal la èd pou ijans la, kote li fè konnen tanpèt la ka touché yon milyon moun.
Lamarin Etazini voye USS Iwo Jima ann Ayiti pou ede bay èd imanitè. Bato a pote ekspè medikal, enjenyè ak elikòptè.
Metewolojis ayisyen Marcelin Esterlin ki t ap reponn kesyon Jean Robert Philippe di nou sistèm nan ki byen òganize ap kontinye evolye nan zòn nan.
Klike sou ikon ki anwo e adwat atik la pou w tande repòtajsa yo.
