Nan Siri, pwotestatè nan opozisyon an ap pare pou yo pran beton an malgre mezi sere-boulon mòtel gouvènman an ap aplike kont manifestan yo.
Kidonk gen planifikasyon ki fèt pou genyen yon manifestasyon vandredi 29 avril 2011 la nan tout peyi a nan sa ki reprezante yon demonstrasyon kolè ki fèt chak semen depi kèk tan kont gouvènman prezidan siryen an, Bashar el-Assad.
Gwoup entèdi Fratènite Muzulman an ap patisipe pou la premyè fwa direkteman nan mouvman pwotestasyon yo.
Nan deklarasyon Gwoup la voye bay ajans nouvèl Reuters, li egzòte sitwayen yo pou yo pran lari e fè vwa yo fè yon sèl an favè libète ak diyite.
Nan vil Jenèv nan peyi Laswiss, Konsèy Dwa Zimen Nasyonzini an ap fè deba sou dosye Lasiri a nan yon seyans dijans Lèzetazini te reklame.
Washington elabore yon pwojè rezolisyon ki mande kreyasyon yon komisyon endepandan ki ap gen pou panche sou akizasyon abi dwa moun nan Lasiri.
Manm Konsèy Sekirite Nasyonzini yo pat reyisi avan sa nan semèn nan mete yo dakò sou yon deklarasyon ki kondane vyolans gouvènman Siri a ap fè kont manifestan sitou akoz rezistans kèk alye Siri nan Konsèy la an palan de Larusi, Lachinn ak Liban.