Pandan yon odisyon Komisyon Sena Ameriken an kap Travay sou Zafè Etranje fè Jedi 27 Jiyè sou sityasyon Ayiti, Senatè Repibliken eta Florid la, Marco Rubio dekri Ayiti tankou yon tèt chaje.
"Ayiti se yon dezas kounyea, sityasyon an pi mal ke jamè. Map suiv sakap pase pa sèlman paske nan rejyon Sid eta Florid kote mwen abite gen yon gwo kominote Ayisyen-Ameriken, men tou li sitye sèlman 1046 kilomèt ak Miami e tout sa ki pase la kase kè nou epitou gen konsekans dirèk sou eta Florid ak peyi Etazini an gwo."
Rubio pale tou de kontwol gang yo genyen sou Ayiti.
"Gang yo kontwole 60% peyi a! Lè moun ki gen plis pouvwa nan peyi w gen ti non jwèt 'babecue' se pa yon bon bagay."
Rubio di seri kriz Ayiti ap travèse akoz pa gen okenn polisyen eli depi mwad Janvye lakoz moun ap kouri kite peyi a pa bann e pa pakèt epi yap ateri nan lakou peyi Etazini.
"Franchman mwen pa konprann ditou - mwen pap chache blame pèsonn - paske sa montre kijan pwoblèm Ayiti konplike - men kisa nou dwe fè pou avanse? Paske sityasyon an gen konsekans pou Etazini, se pa yon sityasyon nan yon peyi ki pa lot bo mond lan -Ayiti pa lwen Sid Florid ak Sidès Etazini."
Senatè Repibliken an di nan komansman odisyon an ke nan moman kominote entènasyonal la ap pale de asistans finansye pou kore fos polis nasyonal Ayiti, yon bon posyon moun kap chache antre nan pwogram Pawol Imanitè Prezidan Joe Biden nan se polisye.
"Se pa janm yon bon siy lè moun ki sipoze ap sovgade sekirite a ap chache kite peyi a."
Rubin eksprime dout sou ide fos entèvansyon entènasyonal kap diskite kounyea paske li fè remake dènye fwa te gen yon fos konsa an Ayiti, li te komèt abi kont pèp Ayisyen an pami yo abi seksyèl epitou koze yon epidemi kolera.
