Anpil sivivan tranblemanntè ki frape Mawòk la ap goumen pou jwenn abri Madi, apre yo finn pase 4 swa ap dòmi deyò. Pandansetan moun ki abite nan yon vilaj nan morn ke sekous la devaste fè konnen jan yo fristre paske otorite yo pa ede yo ditou.
Sekous la, ki te mezire 6,8 sou nechèl Richter la e ki frape Montay Atlas yo byen ta Vandredi swa, lakoz 2,901 moun mouri. Gen plis pase 5,530 ki blese dapre televizyon nasyonal la.
Sete tranblemanntè ki fè plis dega nan Mawòk depi ane 1960.
Sekouris ki soti Espay, Angletè ak Qatar tap ede sekouris Mawoken yo tandiske Itali, Bèljik, La Frans ak Almay fè konnen gouvènman Mawoken an poko apwouve of yo fè pou voye asistans.
Sityasyon an pi dezespere toujou pou moun ki abite nan zon elwaye yo, kote sekouris yo paka rive sou yo akoz lavalas tè ki bloke wout yo. Moun ki abite nan zòn kote yo debleye wout yo yomenm rale yon souf apre sekouris yo rive pou monte tant, epi distribye dlo ak manje.
