Gen prèske 4 milyon moun ki deja vote nan eta Florid. Chif preliminè otorite yo anrejistre endike Repibliken yo taka gen yon gwo avantaj lè eleksyon an pran fen Madi.
Dapre chif yo pibliye Jedi, 1,7 milyon Repibliken deja depoze bilten pou kous elektoral ki pral detèmine si Gouvènè Repibliken Ron DeSantis ak Senatè Marco Rubio re-eli nan pòs yo. Gen 1,4 milyon Demokrat ki vote.
Pati Repibliken Florid la taka ogmante tou reprezantasyon li nan Lachanm, gras an pati ak yon nouvo kat kongresyonèl ki favorize kandida Repibliken yo.
DeSantis ap fè fas ak ansyen Repibliken ki vin Demokrat Charlie Crist. Misye te gouvènè Florid ant 2007 ak 2011. Pi resaman li te reprezante Florid kòm depite nan Lachanm.
Rubio bò kote pa l ap fè fas ak Depite Demokrat Val Demings, ki te premye chèf polis fanm vil Orlando.
Nan Florid, gen plis nouvo elektè Repibliken ke Demokrat ki enskri pou vote.
Anpil kandida ap mennen kanpay wikèn sa a ki se dènye opotinite y ap genyen anvan eleksyon Madi 8 Novanm nan. Ansyen Prezidan Donald Trump pral patisipe nan yon miting politik ak Rubio epi kandida lachanm Repibliken yo Dimanch.
DeSantis limenm pral mennen kanpay separeman toupatou nan eta Florid. Demings ak Crist ap patisipe nan plizyè evenman elektoral toupatou nan eta a tou.
