Lidè la Chanm dè Reprezantan Etazini Nancy Pelosi rive nan vil Seoul, kapital Kore di Sid jodia, dapre sa laprès lokal rapòte.
Pelosi kite Taiwan pi bone jodia apre yon vizit ki te soulve anpil menas bò kote La Chinn.
Pelosi di limenm ak lot manm Kongrè a ki nan delegasyon li te montre yo pap abandone angajman yo vizavi zile Taiwan, ki gen yon gouvènman demokratik.
"Mwen espere li kle kou dlo kòk ke malgre la Chinn anpeche Taiwan patisipe nan kek rankont, yo konprann ke yo paka anpeche moun vizite Taiwan. Se yon demonstrasyon amitye, sipò men tou yon sous edikasyon sou kijan nou ka travay ansanm ak kolabore pi byen. Mwen kwe yo te babye paske mwen se lide La Chanm mwen sipoze - mwen pa konnen si sete yon rezon oubyen yon preteks. Yo pat janm di anyen le mesye yo te vini."
La Chinn reklame Taiwan kòm teritwa pa li e li opoze tout angajman responsab Taiwanè yo genyen ak gouvènman etranje.
Pelosi te rankontre lidè Taiwan yo Mèkredi.
Peken te lanse avètisman pou di pinga l'al vizite zile a epi li te anonse lap tanmen egzèsis militè - pami yo egzèsis ak veritab zam nan dlo ak nan syèl ozalantou Taiwan. Anons sa a te fèt apre Pelosi te rive Taipei.
Taiwan te oblije epapiye djèt li yo pou avèti 27 avyon chinwa ki te antre nan zòn defans ayeryen li an, dapre sa ministe defans zile a rapòte. Li ajoute gen 22 nan avyon sa yo ki te travèse liy demakasyon ki separe zile a ak La Chin.
Ekspè yo lanse avètisman pou di lè yon peyi sèvi ak veritab zam nan espas ayeryen oubyen lanmè yon peyi, yo taka konsidere sa tankou yon zak lagè.
Met sou manèv militè yo, kòm revanch pou vizit Pelosi a, depatman La Dwann la Chinn anonse lap sispann enpòtasyon fwi sitrus ak kèk tip pwason nan Taiwan. Ministè komès la entèdi limenm ekspòtasyon sab natirèl nan Taiwan.
Minis Afè Etranjè Chinwa Wang Yi kritike vizit Pelosi a jodia.
" Vizit Pelosi nan rejyon an se yon fars. Etazini ap pretann ke se nan kad demokrasi men se yon vyolasyon souvrènte La Chin. Prezidan Taiwan Tsai Ing-wen ak moun tankou'l eseye konte sou pouvwa Etazini pou pran endepandans li, ki se yon trayizon entere nasyonal la Chin an jeneral. Zak konsa pap chanje konsansis entènasyonal la ki se ke gen yon sèl Chinn nan mond lan. Yo paka chanje listwa non plis ni mouvman kap fèt pou reyinifye zile Taiwan ak La Chinn. Moun ki jwe ak dife pral boule, e sa yo ki ofanse la Chin pral jwen pinisyon. "
Etazini konfime ke la Chin voye yon lèt pwotestasyon bay anbasadè Ameriken Nicholas Burns nan Peken, e ke Burns te reitere ke Etazini pare pou travay ak La Chinn pou anpeche tansyon yo ogmante epi kenbe liy kominikasyon yo ouvè.
Etazini pa gen relasyon diplomatik ofisyèl ak Taiwan, men li oblije respekte lwa Ameriken ki di fòk li bay Taiwan mwayen pou'l defann tèt li.
Enfomasyon pou repotaj sa a soti nan Associated Press ak Reuters
