Direktè yon jounal an-lign mouri ansasinen madi 15 mas la o Meksik; se dènye jounalis an dat yo touye ane sa a nan peyi a ke moun konsidere depi lontan deja kòm peyi ki gen plis risk nan lemond pou jounalis.
Lapolis nan Eta Michoacan, nan pati lwès Meksik, fè konnen Armando Linares, ki t ap dirije sitweb Monitor Michoacan, pran bal e li mouri lakay li nan vil Zitacuaro. Asasina sa a rive kèk semèn sèlman apre Roberto Toledo, yon kòlèg li nan menm jounal la, te pèdi lavi l nan menm sikonstans yo.
Gen lontan depi gang dwòg lokal yo ap konba pou tèritwa nan Eta Michoacan. Dapre Associated Press, Linares te fè konnen li te resevwa anpil menas lanmò apre li te enskri nan yon pwogram gouvènmantal pou pwoteksyon jounalis.
Kèk nan enfòmasyon sa yo sòti nan Associated Press, Reuters, ak Agence France-Presse.
