'Mwen Pèdi Tout Bagay': Manifestasyon Anti-COVID Nan Guadeloupe Dejenere nan Dezòd

La Frans voye inite espesyal lapolis nan Guadeloupe pou jere manifestasyon kont restriksyon COVID-19 yo.

Moun pran lari pou piye epi mete dife nan machin pandan 3 jou youn apre lòt. Barikad manifestan yo monte lakoz wout zile a yo prèske enpasab.

Ponpye rapote 48 entèvansyon e otorite yo di yo mete 38 moun anba kòd.

Zile a, ki gen 400,000 abitan gen youn nan to vaksinasyon kont COVID-19 ki pi ba yo - swa 33% - konpare ak 75% pou rès peyi a.

Nan Pointe-a-Pitre, pi gran vil zile a, gen 3 moun ki blese nan manifestasyon yo - pami yo yon granmoun 80 zan ki pran yon bal pandan li te kanpe sou balkon li. Yon ponpye blese tou e plizyè magazen nan Pointe-a-Pitre ak lòt vil yo. Yo mete dife nan yon komisarya lapolis nan Morne-a-l'Eau tou.

Minis Enteryè a Gerald Darmain denonse vyolans la kòm "inakseptab." Li di 50 polisye inite espesyal ap rive Guadeloupe Dimanch, met sou 200 lòt polisye ke la Frans te voye anvan sa.

Prefè zile a enpoze yon kouvre fe ki ann aplikasyon chak swa. Alexandre Rochatte di lap efektiv ant 6pm ak 5am.

Yon sitwayen ki pèdi kay li apre manifestan mete dife ladann deklare "mwen pèdi tout bagay."

Emilie Guisbert, 47 an, di li tap domi lakay li - yon bilding ki se pwopriyete papa'l lè yo mete dife ladann Jedi swa. Zanmi li te kouri leve'l e li te gen tan abiye epi kouri sòti ak chyen li yo, li di Associated Press.

"Se 100 an souvni yon fanmi Gwadloupeyen ki pati nan 15 minit apre dife pran nan kay la," li deklare.