Vedèt tenis Serena Williams ak ansyen aktris Amerikèn Meghan - ki se madanm Prens Harry d'Angletè - rakonte defi yo oblije leve antanke manman pitit, nan premye podcast Duchès Sussex la.
Pami istwa yo rakonte - nou jwenn istwa kote yo te oblije travay apre kèk ensidan ki te ba yo gwo kè sote pou timoun yo.
Williams, ki ranpote 23 tounwa tenis Gran Chelèm, te anonse sa pa gen lontan ke "kont a rebou a" tanmen pou li pran retrèt li. Li rakonte nan podcast "Archetypes" Megan nan ke rezo Spotify te pibliye 23 Out ke li te oblije jwe yon match nan Open Franse a an 2018, apre li te pase nwit blanch akoz pitit fi li Olympia te kase ponyèt li.
Serena deklare: "Mwen pa konn kijan mwen te resi genyen match la, men mwen te tèlman epwize emosyonèlman apre sa sete yon bagay fou. E ou konnen chak swa apre sa mwen te pase tout nwit la ak li e mwen te rasire'l map rete ave'l."
Williams di tounwa final li se pral US Open nan ki pral tanmen nan Noyok semèn pwochèn.
Chanpyon tenis la bon zanmi ak Meghan e yo te pase anpil tan ap koze nan epizod Madi a sou defi ki poze pou yo lè yap eseye jere karyè yo ki wo pwofil e kote yo anba je piblik la tout tan, epi obligasyon yo antanke manman pitit.
Meghan mande'l: "Donk ou tal jwe match la apre sa, san pèson pat konnen sak te pase'w lavèy? Yo te bliye kote imen istwa a."
Apre sa, Meghan rakonte yon ensidan ki rive pandan yon vizit ann Afrik di Sid ak mari li Prens Harry epi pitit gason yo Archie, kote dife te pete nan chanm pitit gason ni e mesye dam yo te oblije kite pitit yo apre sa pou y'al fè travay ofisyèl antanke manm fanmi wayal la.
Archie te sipoze ap domi nan moman an, men bonn nan te deside pranl pou manje yon ti kichoy. Ensidan an te boulvèse tout moun.
Meghan di li te vle pase plis tan ak pitit li men li te oblije akonpaye Harry nan yon lot angajman ofisyèl.
Meghan deklare: "Yo te konsantre pito sou kijan moun pral wè absans mwen olye kijan mwen te santi'm nan moman an. Yon gwo pati nan sansibilizasyon an sete voye jete baryè ak etikèt ak achetip sa yo, e esye gen plis konperyansyon sou moman nan lavi yon kretyen vivan ke piblik la pa wè e yo pa o kouran de yo non plis, men kanmenm bay moun tan pou respire."
Li ajoute: "Paske nou te oblije kite pitit nou."
Williams ki pral fete 41 an nan mwad Septanm nan te pale tou de desizyon vedèt tenis la pou'l pran retrèt li. Williams di li te pale ak Prens Harry sou sa, anvan li te anonse desizyon ni piblikman.
Serena deklare: "Byen antandi map pran retrèt mwen pwofesyonèlman, men se tou yon evolisyon. Map fè plis travay ak biznis mwen. E mwen vle fè plis pitit. E ou konnen sa ap trennen depi two lontan. Antanke fanm ou paka kite bagay konsa trennen twop. "
Harry ak Meghan gen yon kontra pou plizyè zane pou pwodwi e anime podcast pou Spotify ke konpayi pwodiksyon yo Archewell Audio va pibliye. Meghan di podcast Archetypes la pral konsantre sou etikèt ak stereyotip moun konn mete sou do medam yo.
Met sou kontra yo siyen ak Spotify, koup la gen youn ak Netflix tou.
Nap raple ke kHarry ak Meghan te vag sou responsabilite yo antanke manm fanmi wayal la an Mas 2020 akoz sa yo te konsidere tankou envazyon nan vi prive yo ak atitid rasis laprès Britanik vizavi Meghan.
Yo te al viv Kalifoni, kote yap elve 2 pitit yo, Archie ak Lili.
Enfomasyon pou repotaj sa a soti nan Associated Press.
