Nan peyi La Frans, yon tribinal nan vil Pari kondane ansyen diktatè panameyen Manuel Noriega pou l pase 7 tan nan prizon pou blanchiman plizyè milyon dola li te fè nan dwòg. Tribinal fransè a jwenn mesye Noriega koupab mèkredi 7 jen an pou blanchiman anviwon $2 milyon lajan dwòg. Li te anba akizasyon kòmkwa li te konn resevwa lajan nan men gwo bawon dwòg kolonbyen yo pandan li te sou pouvwa a nan ane 80 yo e li te depoze kòb sa a nan yon bank fransè .Youn nan avoka mesye Noryega yo, mèt Antonin Levy, konsidere vèdik tribinal la kòm yon desizyon politik.
Mèt Levy di: "Tout pwoblèm nan se yon afè politik. Yo eseye tout mwayen pou yo kenbe jeneral Noriega nan prizon. Yo pa vle l sòti. Li nan prizon depi plis pase 20 tan e, ak vèdik sa a, yo vle kenbe l dèyè bawo toujou.Yo pral fè tout sa yo kapab pou l rete nan prizon e pou l pa tounen Panama."
Jeneral Noriega te jwenn arestasyon n an 1990 apre Etazini te anvayi Panama e wete misye sou pouvwa a. An 1992 yon tribinal ameriken te kondane l pou l pase 40 tan nan prizon ---yon santans yo te vinn redui a 30 tan, e ansuit 17 tan. Nan kòmansman ane sa a otorite amerikèn yo te ekstrade l nan peyi Lafrans. Olivier Metzner, yon lòt avoka mesye Noriega, di la près vèdik tribinal fransè a se yon santans ki sevè. Daprè mèt Metzner, Jeneral Manuel Noriega malad anpil.